វ៉ាស៊ីនតោន៖ មន្ត្រីរដ្ឋបាលជាន់ខ្ពស់របស់សហរដ្ឋអាមេរិក បាននិយាយនៅថ្ងៃពុធនេះថា ប្រធានាធិបតីសហរដ្ឋអាមេរិក លោក ចូ បៃឌិន នឹងមានពេលវេលាឯកជន ជាមួយមេដឹកនាំសមាគមន៍ប្រជាជាតិអាស៊ីអាគ្នេយ៍ ដែលកំពុងបំពេញទស្សនកិច្ចនៅក្នុងអំឡុងពេលកិច្ចប្រជុំកំពូលមួយក្នុងសប្តាហ៍នេះ ក្នុងរដ្ឋធានីវ៉ាស៊ីនតោន។

មន្ត្រីរូបនេះក៏បានប្រាប់អ្នកសារព័ត៌មានថា ការពិភាក្សាកំពុងដំណើរការជាមួយសមាគមប្រជាជាតិអាស៊ីអាគ្នេយ៍ (អាស៊ាន) អំពីលទ្ធភាពនៃការមានកៅអីទទេតំណាងឱ្យប្រទេសមីយ៉ាន់ម៉ានៅក្នុងកិច្ចប្រជុំកំពូលនេះ។

អាស៊ានបានរារាំងរបបយោធាមីយ៉ាន់ម៉ាពីការចូលរួមក្នុងកិច្ចប្រជុំកំពូលរបស់ខ្លួន រហូតដល់វាឃើញវឌ្ឍនភាពនៅក្នុង "ការឯកភាព" ប្រាំចំណុចដែលបានព្រមព្រៀងគ្នាកាលពីឆ្នាំមុន ក្នុងក្តីសង្ឃឹមនៃការបញ្ចប់អំពើហិង្សាដែលបានផ្ទុះឡើងចាប់តាំងពីឧត្តមសេនីយ៍បានដណ្តើមអំណាច និងឃុំឃាំងមេដឹកនាំជាប់ឆ្នោតតាមលទ្ធិប្រជាធិបតេយ្យរបស់ប្រទេស៕